पहिलो समलिंगी बिहे

लिंग परिवर्तन गरेर क्युवामा नै पहिलो समलिंगी बिहे गर्न लागेको जोडीले आफ्नो बिहे फिडेल क्यास्ट्रोलाई जन्मदिनको उपहार दिने भएका छन्
क्युवामा लिंग परिवर्तन गरेर महिला बनेका पुरुष र अर्का एक पुरुषले बिहे गर्न लागेका छन् । वेन्डी इरिएपा कानुनी रूपमा पुरुष हुन् ।  २००७ मा अपरेसन गरेर वेन्डीले लिंग परिवर्तन गरेका थिए । क्युवामा लिंग परिवर्तनलाई कानुनी मान्यता छ । वेन्डीको हुनेवाला जीवनसाथी इग्नेसिया इस्टार्डा क्युवामा समलिंगी बिहेको नाम चलेका समर्थक मानिन्छन् । इग्नेसिया एचआइभी पोजिटिभ पनि हुन् ।
आफ्नो बिहे नेता फिडेल क्यास्ट्रोका लागि उपहार भएको पनि यो जोडीले बताएको छ । उनीहरूको बिहेको दिन क्यास्ट्रोको जन्मदिन पर्छ । क्युवामा समलिंगी महिला-पुरुष तथा ट्रान्सजेन्डर व्यक्तिविरुद्ध भेदभाव हुने गरेको छ ।
क्रान्तिको सुरुवाती दिनमा कैयौँ समलिंगी पुरुष-महिला तथा ट्रान्सजेन्डर व्यक्तिलाई श्रम शिविरमा पठाइने गरिन्थ्यो । तर, राहुल क्यास्ट्रो सत्तामा आएपछि भने समलिंगी अधिकारमा केही सुधार गरिएको थियो । राहुल क्यास्ट्रोले सत्ता सम्हालेपछि नै लिंग परिवर्तनलाई कानुनी मान्यता दिइएको थियो ।
वेन्डीले लिंग परिवर्तन गराएको अस्पतालकी प्रमुख राहुल क्यास्ट्रोकी छोरी मेरियला छिन् । वेन्डी भन्छन्- मलाई अत्यन्त खुसी लागिरहेको छ । हाम्रो बिहे क्युवाको पहिलो समलिंगी बिहे बनेको छ । यसलाई कुनै राजनीतिक रूपमा हेरिनुहुँदैन । हाम्रो बिहे फिडेल क्यास्ट्रोको जन्मदिनमा उपहार हुनेछ । तर, हाम्रो बिहेमा सरकारी मान्यता छ वा छैन भन्नेबारेमा मलाई केही मतलब छैन ।
इग्नेसियो इस्टाडाले  जानेदेखि आफू सधैं समलिंगी पुरुष मान्ने गरेको बताउँछन् । तर, वेन्डीसँग  सम्बन्ध  बिल्कुल फरक भएको उनी बताउँछन् । उनी भन्छन्- आज म के बनेको छु भन्नेबारेमा मलाई केही थाहा छैन तर, म एक महिलासँग औधी प्रेम गर्छु ।
आफ्नो बिहे कसैलाई चिढ्याउन नभएर वेन्डीसँग सम्बन्ध गाँस्न भएको उनले बताए । फिडेल क्यास्ट्रोको ८५औँ जन्मदिनको उपलक्ष्यमा क्युवामा उत्सव मनाइँदै छ । तर, उत्सवमा क्यास्ट्रोमा सहभागी हुने विषयमा केही बताइएको छैन । २००६ मा बिरामी भएपछि फिडेलले भाइ राहुललाई सत्ता सुम्पेका थिए ।