चुम्बन प्रस्ताव नमान्दा ९२ वषर्ीया वृद्धाले छिमेकीलाई चलाइन् गोली

सेन्ट पिटर्सवर्गकी ९२ वर्षीया वृद्धाले आफूलाई चुम्बन नगरेको झाँकमा ५२ वर्षीय छिमेकी पुरुषलाई गोली हानेकी छिन् । हेलन स्टोडिगर नामक ती वृद्धाले आफ्नो छिमेकी डबाइट बेटनरलाई आफ्नो मनको कुरा खोल्दै आफूलाई किस गर्न आग्रह गरिन् । आफ्नो हजुरआमासरहकी ती वृद्धालाई किस गर्न डबाइटले किन मान्थे ? उनले वृद्धाको प्रस्ताव सीधै अस्वीकार गरे ।

आफ्नो मनको कुरा मुखै खोलेर जाहेर गर्दा छिमेकी डबाइटले इन्कार गरेपछि वृद्धा हेलनको रिसको पारो तात्यो । उनलाई डबाइटले आफ्नो प्रस्ताव अस्वीकार गरेकोमा हीनताबोध भयो । अनि उनले निकालिन् अटोमेटिक पेस्तोल । अनि चलाइन् गोली छिमेकी डबाइटको टाउकोलाई ताकेर । तर, भाग्यवश उनले चलाएको गोली डबाइटलाई लाग्न पाएन । 'केही गरी मेरो टाउको एक इन्चमात्र अगाडि भइदिएको भए गोली वारपार हुन्थ्यो,' डबाइटले पुलिससमक्ष घटनाबारेमा बताएका छन्, 'म भाग्यले बाँचँ ।' गोली चलाउने ती वृद्धालाई पुलिसले नियन्त्रणमा लिएको छ । वृद्धाले आफ्नो प्रस्ताव डबाइटले सीधै अस्वीकार गरेपछि आफूलाई निकै रिस उठेको र रिसकै झोँकमा उनीमाथि गोली चलाएको बयान पुलिसलाई दिएकी छन् । छिमेकी पुरुषले किस गर्न नमाने पनि वृद्धा घरभित्र पसेकी थिइन् । त्यसको केही मिनेटमै हातमा पेस्तोल लिएर निस्किएकी उनले डबाइटलाई ताकेर गोली हानेकी थिइन् ।